ពលរដ្ឋ​នៅ​តាម​បណ្ដោយ​ផ្លូវ​ដែក​គ្មាន​ទំនុក​ចិត្ត​ចំពោះ​រដ្ឋាភិបាល​ដែល​ឲ្យ​រក្សា​ភាព​ស្ងៀមស្ងាត់

ប្រភព៖​​  វិទ្យុអាស៊ីសេរី, ថ្ងៃទី០៩ ខែ​០២​ ឆ្នាំ២០១៦, ដោយ ខែ សុណង

3fa44479-8fd4-4ef3-b279-b6aa23469530

ទិដ្ឋភាព​នៅ​តាម​បណ្ដោយ​ផ្លូវ​រថភ្លើង​ក្នុង​សង្កាត់​បឹងកក់២ ខណ្ឌ​ទួលគោក រាជធានី​ភ្នំពេញ។ រូបថត​ថ្ងៃ​ទី​២៤ ខែ​ធ្នូ ឆ្នាំ​២០១៥

ក្រសួង​សាធារណការ និង​ដឹក​ជញ្ជូន បាន​អំពាវនាវ​ឲ្យ​ប្រជាពលរដ្ឋ​ដែល​រស់នៅ​តាម​បណ្ដោយ​ផ្លូវ​ដែក​ក្នុង​រាជធានី​ភ្នំពេញ រក្សា​ភាព​ស្ងៀមស្ងាត់ និង​បន្ត​ប្រកប​អាជីវកម្ម​ប្រចាំ​ថ្ងៃ​ជា​ធម្មតា ដើម្បី​ទុក​ឱកាស​ឲ្យ​រដ្ឋាភិបាល ពិនិត្យ និង​ពិចារណា​រក​ដំណោះស្រាយ​ជុំវិញ​ផល​ប៉ះពាល់​ពី​គម្រោង​សាងសង់​ផ្លូវ​អាកាស​ល្បឿន​លឿន។ ការ​អំពាវនាវ​នេះ បន្ទាប់​ពី​ពលរដ្ឋ​ទៅ​ប្រមូល​ផ្ដុំ និង​ស្នើ​ឲ្យ​រដ្ឋាភិបាល រៀបចំ​វេទិកា​សាធារណៈ​មួយ ដើម្បី​ជជែក​គ្នា​ពី​គម្រោង​វិនិយោគ​សាងសង់​នេះ។

ពលរដ្ឋ​រស់នៅ​តាម​បណ្ដោយ​ផ្លូវ​ដែក បាន​ហៅ​ការ​អំពាវនាវ​ឲ្យ​ពលរដ្ឋ​រក្សា​ភាព​ស្ងៀមស្ងាត់ គឺ​ជា​ការ​លួង​ចិត្ត​ពួក​គាត់ ដើម្បី​អនុវត្ត​គម្រោង​វិនិយោគ​សាងសង់​ផ្លូវ​អាកាស​ល្បឿន​លឿន។

ពលរដ្ឋ​រស់នៅ​សហគមន៍​ផ្លូវ​រថភ្លើង​ភូមិ​២៣ ក្នុង​សង្កាត់​បឹងកក់២ ខណ្ឌ​ទួលគោក លោកស្រី នី សន្ដោស មាន​ប្រសាសន៍​ថា ប្រជាពលរដ្ឋ​ពុំ​មាន​ទំនុក​ចិត្ត​សោះ ពេល​អាជ្ញាធរ​ប្រាប់​ឲ្យ​ពួក​គាត់​រក្សា​ភាព​ស្ងៀមស្ងាត់ ក្នុង​គ្រា​ដែល​លេច​ឮ​ពី​គម្រោង​សាងសង់​ផ្លូវ​អាកាស ដែល​នឹង​ប៉ះពាល់​ផ្ទះ​សម្បែង​របស់​ពួក​គាត់«ការ​ពិត​យើង​មិន​ជឿជាក់​លើ​គាត់​ប៉ុន្មាន​ទេ ខ្លាច​គាត់​ថា​ឲ្យ​យើង​រក្សា​ស្ងប់ស្ងាត់​ទៅ ស្រាប់​តែ​គាត់​ចាប់​ផ្ដើម​ធ្វើ​សកម្មភាព​អ្វី​មួយ យើង​ពិបាក​ទុក​ចិត្ត​មែន​ទែន។ កន្លង​មក ឲ្យ​យើង​រក្សា​ភាព​ស្ងប់ស្ងាត់ ចាប់​ផ្ដើម​សកម្មភាព​បណ្ដេញ​ទីណាត់ទីណែង យើង​អត់​មាន​ទំនុក​ចិត្ត​សោះ។ ខ្លាច​តែ​គាត់​ថា​ឲ្យ​យើង​នៅ​ស្ងៀមៗ​អ៊ីចឹង​ណា គាត់​មាន​ផែនការ​របស់​គាត់​ផ្សេង​ទៅ ភាគ​ច្រើន​ធ្លាប់​ឃើញ​តែ​អ៊ីចឹង​ដែរ។ យើង​រក​ទុក​ចិត្ត​គាត់​អត់​បាន»

ក្រសួង​សាធារណការ និង​ដឹក​ជញ្ជូន នៅ​ថ្ងៃ​ទី​៩ កុម្ភៈ បាន​ចេញ​សេចក្ដី​ប្រកាស​ព័ត៌មាន​មួយ​ឲ្យ​ប្រជាពលរដ្ឋ​ដែល​រស់នៅ​តាម​បណ្ដោយ​ផ្លូវ​ដែក​ក្នុង​រាជធានី​ភ្នំពេញ រក្សា​ភាព​ស្ងៀមស្ងាត់ និង​បន្ត​ប្រកប​អាជីវកម្ម​ប្រចាំ​ថ្ងៃ​ជា​ធម្មតា ដើម្បី​ទុក​ឱកាស​ឲ្យ​រដ្ឋាភិបាល ពិនិត្យ និង​ពិចារណា​រក​ដំណោះស្រាយ។ លិខិត​ដដែល​បញ្ជាក់​ថា គម្រោង​សាងសង់​ផ្លូវ​អាកាស​ល្បឿន​លឿន​នេះ កំពុង​ស្ថិត​នៅ​ក្នុង​ដំណាក់​កាល​សិក្សា​នៅ​ឡើយ។ រដ្ឋាភិបាល​យល់​ថា គម្រោង​វិនិយោគ​លើ​ហេដ្ឋារចនាសម្ព័ន្ធ គឺ​ជា​ជម្រើស​មួយ​ល្អ​ប្រសើរ​ក្នុង​ការ​សម្រេច​ចិត្ត ព្រោះ​នាំ​មក​ជូន​នូវ​ប្រព័ន្ធ​ដឹក​ជញ្ជូន​ក្នុង​ក្រុង​បាន​ល្អ កាត់​បន្ថយ​ការ​កក​ស្ទះ ផ្ដល់​ផល​ប៉ះពាល់​តិចតួច​លើ​បរិស្ថាន និង​សង្គម និង​ផ្ដល់​ប្រយោជន៍​ធំធេង​សម្រាប់​សេដ្ឋកិច្ច​ជាតិ។

រដ្ឋាភិបាល បាន​ឯកភាព​ដាក់​ជូន​ក្រុមហ៊ុន​ឯកជន ដើម្បី​ធ្វើ​ការ​វិនិយោគ​សាងសង់​ផ្លូវ​អាកាស​ល្បឿន​លឿន​ពី​ស្ថានីយ​ផ្លូវ​ដែក​រាជធានី​ភ្នំពេញ ឆ្ពោះ​ទៅ​អាកាសយានដ្ឋាន​អន្តរជាតិ​ភ្នំពេញ។ គម្រោង​នេះ នឹង​ត្រូវ​សាងសង់​លើ​ផ្លូវ​ដែក​ដែល​មាន​ស្រាប់។

ពាក់ព័ន្ធ​ទៅ​នឹង​គម្រោង​នេះ សង្គម​ស៊ីវិល​ដែល​បាន​តាម​ដាន​រឿង​នេះ វាយ​តម្លៃ​ថា មាន​ពលរដ្ឋ​មិន​តិច​ជាង ២​ពាន់​គ្រួសារ អាច​នឹង​រង​ផល​ប៉ះពាល់។

នាយក​ប្រតិបត្តិ​នៃ​សមាគម​ធាង​ត្នោត លោក អ៊ី សារ៉ុម ថ្លែង​ថា ស្ថាប័ន​ពាក់ព័ន្ធ​គួរ​តែ​ប្រញាប់​រៀបចំ​ឲ្យ​មាន​វេទិកា​សាធារណៈ​មួយ ដើម្បី​ជជែក​ពិភាក្សា​គ្នា​ឲ្យ​បាន​ច្បាស់ ពី​ជំហរ​ទាំង​សង​ខាង ទើប​ឆាប់​មាន​ដំណោះស្រាយ​ល្អ«ក្រសួង​គួរ​តែ​អញ្ជើញ​សហគមន៍ ដើម្បី​ទៅ​ពិភាក្សា ហើយ​និង​បង្ហាញ​គាត់​ឲ្យ​បាន​ជាក់លាក់​ច្រើន​ជាង​ហ្នឹង ព្រោះ​ថា​កន្លង​មក គាត់​ច្រើន​តែ​ធ្វើ​ការ​ប្រមូល​ផ្ដុំ​នៅ​មុខ​ក្រសួង​ហ្នឹង បាន​ចេញ​មក​សន្យា​ម្ដង​ហើយ​ថា គាត់​នឹង​បើក​វេទិកា​សាធារណៈ។ តែ​ឥឡូវ​ក្រសួង​បាន​ចេញ​លិខិត​ហ្នឹង​ហាក់​ដូច​វា​ផ្ទុយ​នូវ​អ្វី​ដែល​គាត់​បាន​និយាយ​កាល​ពី​ថ្ងៃ​មុន។ ដូច្នេះ ដើម្បី​ឲ្យ​មាន​ភាព​ជាក់លាក់ ហើយ​ឲ្យ​មាន​ការ​ជឿជាក់​ពី​ប្រជាពលរដ្ឋ ក្រសួង​គួរ​តែ​កោះ​អញ្ជើញ​គាត់​ទៅ​ធ្វើ​ការ​ពិភាក្សា ហើយ​ឲ្យ​ប្រជាពលរដ្ឋ​តាម​ដាន​ទាំងអស់​គ្នា ខណៈ​ដែល​ការ​សិក្សា​មាន​ដំណើរ​ល្អ​ទៅ​មុខ​អ៊ីចឹង និង​អញ្ជើញ​គាត់​ដើម្បី​ធ្វើ​វេទិកា​សាធារណៈ»

ឆ្លើយ​តប​ទៅ​នឹង​សំណើ​នេះ ក្រសួង​សាធារណការ និង​ដឹក​ជញ្ជូន បាន​បញ្ជាក់​ដែរ​ថា នៅ​ពេល​ដែល​មាន​ការ​សម្រេច​ពី​រដ្ឋាភិបាល ក្នុង​ការ​ផ្ដល់​សិទ្ធិ​ឲ្យ​ក្រុមហ៊ុន​ណា​មួយ​ក្នុង​ចំណោម​ក្រុមហ៊ុន​ពីរ​ដែល​បាន​ស្នើសុំ​វិនិយោគ ក្រសួង​សាធារណការ នឹង​រៀបចំ​វេទិកា​នៅ​នឹង​កន្លែង និង​ធ្វើ​ការ​ដោះស្រាយ​ផល​ប៉ះពាល់​រួច​រាល់​ជា​មុន​សិន មុន​នឹង​អនុញ្ញាត​ឲ្យ​គម្រោង​ដំណើរ​ការ​សាងសង់៕

Advertisements

ដីស្ថានីយរថភ្លើងភ្នំពេញ​​ជាង​១,៧ហិកតាត្រូវ​ធ្វើ​អនុបយោគ​​ជា​ទ្រព្យសម្បត្តិឯកជនរបស់រដ្ឋ​

ប្រភព៖ VOD ដោយ៖​ ស៊ុន​ ណារិន​ | ថ្ងៃចន្ទ ទី18 ឧសភា 2015

រដ្ឋាភិបាល​កម្ពុជា​បាន​ចេញ​ អនុក្រឹត្យ​មួយ​ដោយ​ធ្វើ​អនុបយោគ​ដី​រាជាយស្ម័យយានរាជធានីភ្នំពេញ ដែល​មាន​​​ទំហំដីជាង​១,៧ហិកតា​ទៅ​ជា​ទ្រព្យសម្បត្តិ​​ឯកជន​របស់​រដ្ឋវិញ​។​

អនុក្រឹត្យ​ស្តី​ពី​ការធ្វើ​អនុបយោគ​ប្តូរចំណាត់ថ្នាក់​ពីទ្រព្យ​ សម្បត្តិ​សាធារណៈ​របស់​រដ្ឋមក​ជា​ទ្រព្យ​សម្បត្តិ​ឯកជន​របស់​រដ្ឋ​ ចុះ​ហត្ថលេខាដោយ​លោក​នាយករដ្ឋមន្រ្តី ហ៊ុន សែន កាលពីថ្ងៃ​ទី​១៧​ខែមេសា ឆ្នាំ​២០១៥​ឲ្យ​ដឹង​​ថា​ដី​បឹង​កំប្លោក រាជាយស្ម័យយានកម្ពុជា​នៃ​ក្រសួង​សាធារណៈ​ការ និង​ដឹកជញ្ជូន​ ស្ថិត​នៅ​ផ្លូវ​លេខ​១១០ ភូមិ​៣ សង្កាត់​ស្រះចក​ ខណ្ឌដូនពេញ រាជធានីភ្នំពេញ មានទំហំសរុប​​១៧២១០,៩៧ម៉ែត្រក្រឡា ត្រូវ​ធ្វើ​អនុបយោគជា​ទ្រព្យ​សម្បត្តិ​ឯកជន​របស់​រដ្ឋវិញ។​ បើតាមអនុក្រឹត្យ​ កន្លែង​ផ្សេងៗ​ដែល​ត្រូវ​បាន​ធ្វើ​អនុ​បយោគរួមមានទីស្នាក់ការភូមិ​ពោង​ពាយ​រ ​បស់​ក្រសួង​មហាផ្ទៃ​ ស្ថិត​នៅ ភូមិ​ពោង​ពាយ សង្កាត់​ភ្នំពេញ​ថ្មី​ខណ្ឌ​សែនសុខ ទំហំ​៧១០ម៉ែត្រ​ក្រឡា ដីមួយផ្នែក​រោងចក្រ​ឥដ្ឋ​ទី​១ ​ចាក់អង្រែលើ​របស់​ក្រសួង​ដែន​ដី នគរូបនីយកម្ម និង​សំណង់ ​ស្ថិត​នៅ​ភូមិ​ព្រែក​តាគង់ សង្កាត់​ចាក់អង្រែ​លើ​ ខណ្ឌមានជ័យ ទំហំ​៥០៦៤០ហិកតា​ អគារ​លេខ​១០អតីត​រដ្ឋ​ភណ្ឌាគាររបស់​ក្រសួង​ពាណិជ្ជកម្ម​ ស្ថិត​នៅ​ផ្លូវ​កម្ពុជា​ក្រោម​ សង្កាត់​ផ្សារ​ថ្មីទី​២ ខណ្ឌ​ដូនពេញ រាជធានីភ្នំពេញ ទំហំ​សរុប​៥៥១ម៉ែត្រ​ក្រឡា។​​

អនុក្រឹត្យ​បញ្ជាក់​ថា​ការ​លុប​ទីតាំងខាង​លើ​​ចេញពី​បញ្ជី​សារពើ​ភ័ណ្ឌ​ ទ្រព្យ​សម្បត្តិ​រដ្ឋ​ត្រូវ​ស្ថិ​តនៅ​ក្រោម​ការ​ចាត់​​ចែង​នីតិវិធី​ដោយ​ ក្រសួង​សាធារណៈការ និង​ដឹកជញ្ជូន​ ក្រសួង​មហាផ្ទៃ ក្រសួងពាណិជ្ជកម្ម ក្រសួង​រៀបចំដែនដី នគរូបនីយកម្ម និង​សំណង់ និង​ក្រសួង​សេដ្ឋកិច្ច និង​ហិរញ្ញវត្ថុ។​

អ្នកនាំពាក្យ​គណបក្ស​សង្រ្គោះជាតិ លោក យឹម សុវណ្ណ មានប្រសាសន៍ថា​គណបក្សសង្រ្គោះជាតិ​មិន​គាំទ្រ​ឲ្យ​​មាន​ការ​ធ្វើ​អនុបយោគ​ ដីរាជាយស្ម័យយាននោះទេ​ ដោយ​លោក​ចាត់​ទុក​ថា​នេះ​ជា​ទ្រព្យសម្បត្តិ​មានប្រយោជន៍សម្រាប់​រដ្ឋ។​  លោក​បន្ត​ថា​កន្លង​ទៅ រដ្ឋាភិបាល​បាន​ធ្វើ​ឲ្យ​បាត់​បង់ទ្រព្យ​សម្បត្តិជាតិជាច្រើន​ ​តាមរយៈ​ការ​​ធ្វើ​អនុបយោគ ដោយ​បើក​មាន​ការ​លក់​ទៅ​ឲ្យ​ក្រុម​ហ៊ុន​ឯកជន។​លោក​បាន​បញ្ជាក់​​ថា​ច្បាប់​ ភូមិបាល​កម្ពុជា​មានភាព​ខ្វះចន្លោះ​ ដោយអនុញ្ញាត​ឲ្យ​មាន​ការ​ធ្វើ​អនុបយោគដីដែល​ជាទ្រព្យ​សម្បត្តិ​រដ្ឋ។​

លោក​បញ្ជាក់​ថា​«គួរ​តែ​បញ្ឈប់​ការលក់ ​ផ្ទេរ ឬ​ផ្លាស់ប្តូរ​ដីពីទ្រព្យសម្បត្តិសាធារណៈរបស់រដ្ឋទៅ​ជា​ទ្រព្យសម្បត្តិ​ ឯកជនរបស់រដ្ឋ​ ដែល​បង្ក​ឱកាស​មាន​មាន​ការលក់ បាត់​បង់ទ្រព្យសម្បត្តិ​របស់​រដ្ឋ​ដែល​ជា​ផលប្រយោ​ជន៍ជាតិ។ ខ្ញុំយល់ឃើញ​ថា​គួរតែ​ទុក​(រាជាយស្ម័យយាន)វិញ​ ជា​ទ្រព្យសម្បត្តិរបស់រដ្ឋដែលមិន​អាច​​លក់​បាន ដើម្បី​កុំ​ឲ្យ​បាត់​បង់​ទ្រព្យសម្បត្តិជាតិដែល​ជា​ផលប្រយោជន៍ជាតិ»។​

VODមិនទាន់​អាច​ទាក់​ទង​អ្នកនាំពាក្យ​រដ្ឋាភិបាល លោក ផៃ ស៊ីផាន ដើម្បី​សុំ​ការ​អត្ថាធិប្បាយ​លើ​បញ្ហានេះ​បាន​នៅឡើយទេ។​

យោងតាមមាត្រា១៦នៃច្បាប់ភូមិបាល​ដែល​ត្រូវ​បាន​ប្រកាស​ឲ្យ​ប្រើ​ប្រាស់​នៅ ​ឆ្នាំ​២០០១ ទ្រព្យសម្បត្តិ​សាធារ​​ណៈ​​រប​ស់​រដ្ឋ នៅ​ពេល​បាត់បង់​ផល​ប្រយោជន៍​សាធារណៈ អាច​ត្រូវ​ចាត់​បញ្ចូល​ជា​ទ្រព្យសម្បត្តិ​ឯកជន​របស់​​រដ្ឋ​តាម​រយៈ​ច្បាប់​ អនុបយោគ។ ចំណែក​មាត្រា​១៦ចែងថា​ទ្រព្យសម្បត្តិ​ឯកជន​របស់​រដ្ឋ ​និង​របស់​នីតិបុគ្គល​​សាធារណៈ អាច​ជា​កម្មវត្ថុ​នៃ​ការ​លក់ ការ​ដូរ ការ​បែងចែក​ឬ​ការ​ផ្ទេរ​សិទ្ធិ​តាម​ការ​កំណត់​ដោយ​ច្បាប់។​ ទ្រព្យ​ទាំង​នោះ​អាច​ផ្ដល់​ឱ្យ​តាម​រយៈ​ភតិសន្យា និង​ជា​កម្មវត្ថុ​នៃ​កិច្ចសន្យា ដែល​បាន​ធ្វើឡើង​ត្រឹមត្រូវ​តាម​​ច្បាប់។ លក្ខខណ្ឌ​ទាំងឡាយ​និង​នីតិវិធី​នៃ​ការ​លក់ និង​ការ​គ្រប់គ្រង​ទ្រព្យសម្បត្តិ​ឯកជន​របស់​រដ្ឋ​និង​របស់​​នីតិបុគ្គល​ សាធារណៈ​នឹង​កំណត់​ដោយ​អនុក្រឹត្យ។ គ្មាន​ការ​លក់​ណាមួយ​អាច​ត្រូវ​បាន​សម្រេច​ដោយ​​គ្មាន​អនុ​ក្រឹត្យ​នេះ​ឡើ​ យ។

បើតាមឯកសារប្រវត្តិសាស្រ្ត ​រាជាយស្ម័យយានរាជធានីភ្នំពេញត្រូវ​បាន​បង្កើ​តឡើង​តាំងពី​ឆ្នាំ​១៩៣២។ ​ រាជាយ​ស្ម័យ​យាន​នេះ​ជា​ស្ថានីយរថភ្លើង​ចេញចូល​ពី​ភ្នំពេញ​ទៅ​បាត់​ដំបង និង​ពី​បាត់ដំបងមកភ្នំពេញ៕

ប្រជា​សហគមន៍ ផ្លូវ​រថភ្លើង​ប្រមូលផ្តុំ មុខ​ស្ថានទូត​ហ្វីលីពីន ដើម្បី​សុំ​អន្តរាគមន៍​

ប្រភព៖ cen.com.kh ថ្ងៃទី 11 ឧសភា 2015 ដោយ៖ មុនីរាជ
ភ្នំពេញ: នៅ​ព្រឹក​ថ្ងៃទី​១១ ខែឧសភា នេះ ប្រជា​សហគមន៍​ផ្លូវ​រថភ្លើង ក្នុង​រាជធានី​ភ្នំពេញ បាន នាំគ្នា​ទៅ​ប្រមូលផ្តុំនៅមុខ​ស្ថានទូត​ហ្វីលីពីន ដើម្បី​ធ្វើ​សន្និសីទកាសែត ក្នុង​គោលបំណង​ដើម្បី​ស្នើសុំ​ឲ្យ​ធនាគារអភិវឌ្ឍន៍អាស៊ី ប្រចាំ​នៅ​ហ្វីលីពីន ជួយ​ធ្វើ​អន្តរាគមន៍ មកលើ​ធនាគារអភិវឌ្ឍន៍អាស៊ី​ប្រចាំ​នៅ​កម្ពុជា ដើម្បី​ផ្តល់ព័ត៌មាន​លម្អិត ទាក់ទង​នឹង​គម្រោង​អភិវឌ្ឍន៍​ផ្លូវដែក ជូន​ប្រជា​សហគមន៍​ផ្លូវដែកនៅ​រាជធានី​ភ្នំពេញ​។​

​យោងតាម​ សេចក្តីថ្លែងការណ៍​របស់ ប្រជា​សហគមន៍​ផ្លូវ​រថភ្លើង បាន​ឲ្យ​ដឹងថា ពួកគាត់​នៅតែ​រក្សា​ជំហរ ទាមទារ​ឲ្យ​មាន​កិច្ចប្រជុំ ជា​ត្រីភាគី ដែលមាន​តំណាង​សហគមន៍ ចំនួន​៨​នាក់​តំណាង​ក្រុមហ៊ុន ថូ​ល​រ៉ូយ៉ាល់ ក្រុមហ៊ុន រ៉ូយ៉ាល់​គ្រុប ដែលមាន​សិទ្ធិអំណាច ពេញ លេញ​ក្នុងការ​ឆ្លើយតប​សំណួរ របស់​ប្រជាពលរដ្ឋ និង​ភាគី​តំណាង​ធនាគារអភិវឌ្ឍន៍៍អាស៊ី ប្រចាំ​កម្ពុជា​។​

​ ប្រជាពលរដ្ឋ បាន​បញ្ជាក់ថា ប្រជា​សហគមន៍​ផ្លូវដែក បាន​ព្យា​យ​យាម ជាច្រើនលើក​ច្រើនសា ក្នុងការ​ទាមទារ​យក​ព័ត៌មាន​លម្អិត ស្តីពី​គម្រោង​ផ្លូវដែក​នៅ​កម្ពុជា ជាពិសេស​នៅក្នុង​តំបន់​រាជធានី​ភ្នំពេញ​។ ដោយហេតុ​ធនាគារអភិវឌ្ឍន៍អាស៊ី ប្រចាំ​កម្ពុជា ព្យាយាម​ពន្យារពេល​រហូត​តាំងពី​លិខិតដែល​ប្រជាពលរដ្ឋ បានដាក់​ទៅនៅ​ថ្ងៃទី​៤ ខែសីហា ឆ្នាំ​២០១៤ គឺ​នៅតែ​គ្មាន​ដំណោះស្រាយ​។​

​ ប្រជាពលរដ្ឋ បាន​ទទូច​ឲ្យ​ធនាគារអភិវឌ្ឍន៍អាស៊ី ផ្តល់ព័ត៌មាន​លំអិត​ពី គម្រោង​នេះ​ដល់​ប្រជាពលរដ្ឋ​ដោយហេតុថា ធនាគារអភិវឌ្ឍន៍អាស៊ី ផ្តល់ប្រាក់​កម្ចី​ដល់ រាជរដ្ឋាភិបាល ប្រាកដ​ជាមាន​ព័ត៌មាន​លំអិត​ពី គម្រោង​អភិវឌ្ឍន៍​ផ្លូវដែក​នៅ​កម្ពុជា​។ ធនាគារអភិវឌ្ឍន៍ អាស៊ី ជា​ស្ថាប័ន​អន្តរជាតិ ត្រូវមាន​តម្លាភាព និង​ស្មារតី​ទទួលខុសត្រូវ​ខ្ពស់ ចំពោះ​គ្រួសារ​ដដែល ទទួលរង​ផលប៉ះពាល់​ដោយផ្ទាល់ និង​ដោយ​ប្រយោល​ពីគម្រោង​គាំទ្រ​របស់ខ្លួន​៕ –

 

សវនករ​ទាមទារ​ឲ្យ​ធនាគារ​ ADB ​គោរព​តាម​គោលការណ៍​សំណង​​ពេញលេញ​ដល់​ជន​រងគ្រោះ​នៃ​គម្រោង​ផ្លូវ​រថភ្លើង

ដោយ សុខ ខេមរា,ថ្ងៃ១១ មេសា ២០១៥
6F1705FD-C907-40F5-84B5-77C53E830D66_w640_r1_s

ក្នុង​​រូប​ថត​នេះ​ ជា​​រថភ្លើង​​ដែល​​គ្រប់​គ្រង​ដោយ​ក្រុមហ៊ុន Toll Royal Cambodia កំពុង​រត់​នៅ​ភាគ​ខាង​ត្បូង​ក្រុង​ភ្នំពេញ។ ក្នុង​​រូប​ថត​នេះ​ ជា​​រថភ្លើង​​ដែល​​គ្រប់​គ្រង​ដោយ​ក្រុមហ៊ុន Toll Royal Cambodia កំពុង​រត់​នៅ​ភាគ​ខាង​ត្បូង​ក្រុង​ភ្នំពេញ។

ក្រុម​អ្នក​ត្រួត​ពិនិត្យ​ កិច្ចការ​របស់​ធនាគា​អភិវឌ្ឍ​អាស៊ី​ (ADB)​ និយាយ​ថា​ សំណង​និង​ការ​ទាមទារ​របស់​ជន​រងគ្រោះ​ជាង​៤.០០០​គ្រួសារ​ដែល​ប៉ះពាល់​ដោយ​ ការ​ អភិវឌ្ឍ​ស្តារ​ផ្លូវ​រថភ្លើង​មិន​ត្រូវ​គេ​ដោះស្រាយ​នៅ​ឡើយ​ទេ​ ទោះ​ជា​ធនាគារ​នេះ​ បាន​ទទួល​ស្គាល់​ពី​កំហុស​របស់​ខ្លួន​ថា បាន​ធ្វើ​ឲ្យ​ពលរដ្ឋ​រង​ទុក្ខ​វេទនា​និង​ ប៉ះពាល់​ដល់​ជីវភាព​ពួក​គាត់​ក្តី។​ គណៈ​គ្រប់គ្រង​ធនាគារ​នេះ​ចង់​ឃើញ​សំណង​ ទាំង​ឡាយ​ត្រូវ​ដោះស្រាយ​ជូន​ប្រជាពលរដ្ឋ​ដែល​រង​ផល​ប៉ះពាល់​ទៅ​តាម​ការ​ សន្យា​របស់​ធនាគារ។

ក្រុម​ត្រួត​ពិនិត្យ​លើ​ភាព​អនុលោម​នៃ​ធនាគារ​អភិវឌ្ឍន៍​អាស៊ី ហៅ​ថា Compliance ​Review Panel ​(CRP)​ បាន​និយាយ​ថា ការ​សន្យា​របស់​ខ្លួន​ដើម្បី​នឹង​ដោះស្រាយ​ជូន​ដល់​ពលរដ្ឋ​រងគ្រោះ​ពី​ការ​ បណ្តេញ​ចេញ​ពី​លំនៅដ្ឋាន​ឬ​ការ​តាំង​ទីលំនៅ​ថ្មី​ដោយសារ​ការ​អភិវឌ្ឍ​ស្តារ​ ផ្លូវ​រថភ្លើង​ជា​ច្រើន​ខ្សែ​ក្នុង​ប្រទេស​កម្ពុជា​នោះ​ មិន​ត្រូវ​បាន​ផ្តល់​សំណង​តាម​គោល​នយោបាយ​របស់​ធនាគា​ ADB​ នោះ​នៅ​ឡើយ​ទេ។

ទាក់​ទង​នឹង​បញ្ហា​សំណង គោល​នយោបាយ​របស់​ធនាគារ​ ADB​ ឬ ​អនុសាសន៍​របស់​អភិបាល​គ្រប់គ្រង​ធនាគារ​មាន​ចំនួន​៦​ចំណុច​គឺ​ តម្រូវ​ឲ្យ​ធនាគារ​នេះ​បង្កើត​គម្រោង​ផ្តល់​សំណង​ដល់​ពលរដ្ឋ​ កែ​លម្អ​ហេដ្ឋារចនាសម្ព័ន្ធ​នៅ​កន្លែង​ទី​តាំង​ថ្មី​ ដោះស្រាយ​បណ្តឹង​សារទុក្ខ ​អភិវឌ្ឍ​កម្មវិធី​កសាង​សមត្ថភាព ​បង្កើត​គម្រោង​ដោះស្រាយ​បំណុល និង ​គម្រោង​ស្តារ​ប្រាក់​ចំណូល​ជា​ដើម​នោះ​តាំង​ពី​ដើម​ឆ្នាំ​២០១៤។ ​តែ​អនុ​សាសន៍​ទាំង​នេះ​ មិន​ត្រូវ​គេ​ធ្វើ​តាម​កិច្ចសន្យា​នោះ​ទេ។

បើ​តាម​របាយការណ៍​ត្រួត​ពិនិត្យ​ចុង​ក្រោយ​មួយ​របស់​ក្រុម​សវនករ​នៃ​ ធនាគារ ​ADB ​កាល​ពី​ថ្ងៃ​ទី៦​ ខែ​មេសា​បាន​រក​ឃើញ​ថា​ អ្នក​គ្រប់​គ្រង​ធនាគារ ​ADB ​រដ្ឋាភិបាល​កម្ពុជា​ និង​គណៈកម្មាធិការ​ដោះស្រាយ​ការ​តាំង​លំនៅដ្ឋាន​អន្តរ​ក្រសួង​បាន​ចំណាយ​ពេល ​វេលា​ ថវិកា ​និង​ប្រឹងប្រែង​ធ្វើ​ឲ្យ​គម្រោង​នេះ​វិល​ត្រឡប់​ទៅ​កាន់​ភាព​អនុលោម​តាម​ ការ​សន្យា​វិញ​ដែរ។

ប៉ុន្តែ​របាយការណ៍​នោះ​បញ្ជាក់​ថា ​ការ​ប្រឹង​ប្រែង​នេះ​តម្រូវ​ឲ្យ​ធ្វើ​បន្ថែម​ទៀត៖ «យ៉ាង​ណា​ក៏​ដោយ​ នៅ​មាន​កិច្ចប្រឹង​ប្រែង​បន្ថែម​ទៀត​គឺ​ ទាមទារ​ឲ្យ​ធ្វើ​ដើម្បី​នាំ​គម្រោង​នេះ ​ទទួល​បាន​ការ​អនុលោម​ឲ្យ​បាន​ពេញ​លេញ»។

របាយការណ៍​ត្រួត​ពិនិត្យ​របស់​ក្រុម​សវនករ ​CRPនៃ​ធនាគារ ​ADB ​បាន​រក​ឃើញ​ពី​កំហុស​ធនាគារ​ដែល​ធ្វើ​ផ្ទុយ​ពី​គោល​នយោបាយ​របស់​ខ្លួន​កាល​ ពី​ឆ្នាំ​២០១២​ហើយ​នឹង​បាន​បញ្ជាក់​ទៀត​ថា ​ក្នុង​ចំណោម​អនុសាសន៍ ​ទាំង​៦​របស់​គណៈអភិបាល​គ្រប់គ្រង​ធនាគារ​គឺ​គម្រោង​១​ទាក់ទង​នឹង​ការ​ ដោះស្រាយ​ប្រាក់​បំណុល​មិន​ត្រូវ​គេ​ធ្វើ​តាម​នោះ​ទេ។ ​ស្ថាប័ន​នេះ​បាន​បន្ថែម​ថា៖

«គិត​ត្រឹម​ពេល​ដែល​របាយការណ៍​នេះ​ចេញ​ផ្សាយ​ ធនាគារ​អភិវឌ្ឍន៍​អាស៊ី ​ADB មិន​បាន​ធ្វើ​តាម​អនុសាសន៍​ទេ»។​

ហើយ​ក្រុម​សវនករ​បាន​បញ្ជាក់​ថា ​ធនាគារ​នេះ​ត្រូវ​បង្កើត ​និង​អនុវត្ត​វិធានការ​ ដើម្បី​ជួយ​ដោះស្រាយ​ការ​គាំទ្រ​ចំណូល​ហិរញ្ញវត្ថុ​ចំពោះ​ក្រុម​គ្រួសារ​ជន​ រងគ្រោះ​ ដែល​រង​ផល​ប៉ះពាល់»។

ដោយ​ឡែក​អនុសាសន៍​៥​ទៀត​ដែល​ពាក់ព័ន្ធ​នឹង​ការ​រក​ដំណោះស្រាយ​ សំណង​ប្រជាពលរដ្ឋ​និង​ធ្វើ​ហេដ្ឋារចនាសម្ព័ន្ធ​ ការ​បង្កើត​មុខរបរ​ការងារ​ ធ្វើ​ការ​ហ្វឹកហ្វឺន​ជា​ដើម​នោះ​មិន​ត្រូវ​គេ​ដោះស្រាយ​បាន​ច្រើន​ទេ។

ពលរដ្ឋ​ជាង​៤.០០០​គ្រួសារ​ក្នុង​ទីតាំងជា​ច្រើន​ត្រូវ​រងទុក្ខ ​បាត់​ផ្ទះ ​បាត់ដី​ បាត់​បង់​មុខរបរ​ ជំពាក់​បំណុល​គេ​តាំង​ពី​មាន​ការ​ព្រមព្រៀង​រវាង​រដ្ឋាភិបាល​ ដើម្បី​ស្តារ​ផ្លូវ​រថភ្លើង​ក្នុង​ប្រទេស​កាល​ពី​ឆ្នាំ​២០០៦។​ ពលរដ្ឋ​ដែល​រង​ប៉ះពាល់​ទាំង​នោះ​ភាគច្រើន​រស់​នៅ​តាម​ដង​ផ្លូវ​រថភ្លើង​ ក្នុង​រាជធានី​ភ្នំពេញ​ ប៉ោយប៉ែត ​បាត់ដំបង ​ពោធិ៍សាត់​ និង ក្រុង​ព្រះសីហនុ។

លោក ​អៀង វុទ្ធី ​នាយក​ប្រតិបត្តិ​អង្គការ​សមធម៌​កម្ពុជា​បាន​ថ្លែង​ថា​ ប្រជាពលរដ្ឋ​ ខ្លះ​បាន​ធ្វើ​ការ​រុះរើ​តាំង​ពី​ឆ្នាំ​២០១០​ដល់​២០១២​មក​កំពុង​ជួប​ប្រទះ​ នឹង​បញ្ហា​ ជីវភាព​នៅ​ពេល​ដែល​គ្មាន​ដំណោះស្រាយ។

«អញ្ចឹង​ហើយ​យើង​ឃើញ​ថា​ការ​ពន្យារ​ចំពោះ​ការ​អនុវត្ត​អនុសាសន៍​របស់​ ក្រុម​ ប្រឹក្សាភិបាល​ហ្នឹង​គឺ​ធ្វើ​ឲ្យ​ប៉ះពាល់​ទៅ​ដល់​ជីវភាព​រស់​នៅ​របស់​ ប្រជាពលរដ្ឋ​ខ្លាំង​ មែន​ទែន»។

លោក​ថ្លែង​ថា​ រឿង​ផ្តល់​សំណង​ជា​ច្រើន​ប្រភេទ​ដល់​ពលរដ្ឋ​រងគ្រោះ​នេះ​ គឺ​អាច​ធ្វើ​ទៅ​បាន​ជោគជ័យ​គឺ​អាស្រ័យ​ទៅ​លើ​កិច្ចសហប្រតិបត្តិការ​របស់​ រដ្ឋាភិបាល។ លោក​មិន​ចង់​ឃើញ​មាន​ការ​បង្ខិត​បង្ខំ​ឲ្យ​ធនាគារ​សង​មិន​ចង់​ឃើញ​ការ​ បញ្ចប់​ កិច្ច​សហការ​ទេ។

«អញ្ចឹង​យើង​ចង់​ឃើញ​ទាំង​ធនាគារ​អភិវឌ្ឍន៍​អាស៊ី ​ទាំង​រដ្ឋាភិបាល​ ទាំង​ប្រជាពលរដ្ឋ​ហ្នឹង​ ទទួល​បាន​នូវ​ការ​សហការ​គ្នា​ល្អ។​ យើង​ចង់​ឃើញ​ឲ្យ​មាន​គម្រោង​ដែល​ធ្វើ​ការ​ជាមួយ​គ្នា​ហ្នឹង​បាន​ផល​មក​ដល់​ ប្រជាពលរដ្ឋ ​មិន​ចង់​ឃើញ​នូវ​ការ​រំលោភ​ទៅ​លើ​គោលនយោបាយ​ទៅ​លើ​សិទ្ធិ​របស់​ប្រជាពលរដ្ឋ ​ទេ»។

តំណាង​ពលរដ្ឋគ្រោះ​នៅ​តែ​ទទូច​ឲ្យ​មាន​ការ​ដោះស្រាយ​សំណង​ឲ្យ​ពួក​គេ​បាន​ឆាប់ៗ​ដើម្បី​ស្តារ​ជីវភាព​ឡើង​វិញ។

លោក​ ប៉ុល ទ្រី ​អាយុ​ ៤៣ឆ្នាំ ​មាន​កូន​ក្នុង​បន្ទុក​៥នាក់​ រស់​នៅ​រ៉ា​សំរោង​ ខាង​លិច​ ជាយ​ក្រុង​ភ្នំពេញ​ បាន​ថ្លែង​ថា​ គ្មាន​ការ​ដោះស្រាយ​ទេ​ ហើយ​លោក​ត្រូវ​ប្រឈម​ មុខ​នឹង​បញ្ហា​ជីវភាព​ធ្ងន់ធ្ងរ​ដោយ​សារ​បន្ទុក​ធ្ងន់។

«បង​ប្អូន​ប្រជាពលរដ្ឋ​នៅ​ទី​នេះ​គាត់​ខ្វះ​ខាត​ច្រើន​ណាស់ ​ដោយសារ​អី​ ដោយសារ​គាត់​បាត់​មុខរបរ។​ គាត់​ពិបាក​នឹង​រកស៊ី ​ដោយសារ​មក​រស់​នៅ​ជ្រៅ​ពេក​ ឆ្ងាយ​ពី​ផ្សារ។​ លំបាក​ទាំង​ខ្ញុំ​អី​ហ្នឹង។​ ខ្ញុំ​ធ្វើ​ផ្ទះ​ហើយ​ចោល។ ខ្ញុំ​មក​នៅ​ជាប់​ថ្នល់​ជាតិ​វិញ​ដើម្បី​រកស៊ី​ដោះស្រាយ​ជីវភាព​គ្រួសារ​ ហ្នឹង»។

លោក​បាន​បន្ថែម​ថា​ ទាំង​ធនាគារ​ ADB និង​រដ្ឋាភិបាល​កម្ពុជា​មិន​ទាន់​បាន​ដោះស្រាយ​បំណុល​បង្កើត​ប្រាក់​ចំណូល​ និង​ហេដ្ឋា​រចនាសម្ព័ន្ធ​ផ្លូវ​ថ្នល់​ ទឹក​ភ្លើង ​មន្ទីរពេទ្យ​ សាលារៀន​និង​បញ្ហា​ផ្សេងៗ​ទៀត​ ដែល​ជា​គោល​នយោបាយ​ធនាគារ​ ADB ​នោះ​ជូន​ដល់​ប្រជាពលរដ្ឋ​ទេ។

លោក ​ឆេង ប៊ុន ហាក់ ​អាយុ ​៣៦ឆ្នាំ ​រស់នៅ​ក្នុងភូមិ​ផ្សារ​កណ្តាល ​សង្កាត់​ផ្សារ​ កណ្តាល​ ក្រុង​ប៉ោយប៉ែត ​ខេត្ត​បន្ទាយមានជ័យ​បាន​បញ្ជាក់​ពី​ការ​ទាមទារ​ សំណង​និង​ការ​មិន​ដោះស្រាយ​ជូន​ប្រជាពលរដ្ឋ​តាម​គោល​នយោបាយ​ធនាគារ​ADB​ថា៖

«បញ្ហា​ទី១​ រាជរដ្ឋាភិបាល​និង​ធនាគារ​ ADB ​អត់​បាន​គោរព​ទៅ​តាម​គោលនយោបាយ​ហ្នឹង​ទេ​ ហើយ​ធ្វើ​ហ្នឹង​អត់​បាន​ផ្តល់​ព័ត៌មាន​ ឬ​មួយ​ពិគ្រោះ​យោបល់​ឬ​មួយ​ផ្តល់​ជម្រើស​ទេ។ មាន​គ្រួសារ​ខ្លះ ដែល​ត្រូវ​បាន​ដី​ បាន​អី​ គឺ​បាន​តែ​១០​ដុល្លារ​ក៏​មាន​ដែរ។ ​អញ្ចឹង​អ្វី​ដែល​ធ្វើ​ហ្នឹង​គឺ​ផ្ទុយ​ទាំង​អស់»។

លោក​ថា​ លោក​គួរ​ត្រូវ​បាន​សំណង​តាំង​ពី​ឆ្នាំ​២០១១ ​តែ​ដោយសារ​គេ​មិន​ដោះ​ស្រាយ​ឲ្យ​ នោះ​លោក​បាន​ប្តឹង​រហូត​មក។ ​លោក​បាន​ថ្លែង​ថា ​មាន​អំពើ​ពុករលួយ​ កិបកេង​ដី​ប្រជាពលរដ្ឋ​ខ្លះ​នៅ​ពេល​ចែក​រំលែក​ដី​ជូន​ប្រជាពលរដ្ឋ។​ ដោយសារ​ គេ​យក​ដី​នោះ​ទៅ​លក់ ​ហើយ​អះអាង​ថា​ បាន​ផ្តល់​ជូន​ដល់​ពលរដ្ឋ​រងគ្រោះ ​ហើយ​ តែ​ពលរដ្ឋ​រងគ្រោះ​មិន​ត្រូវ​បាន​ទេ។​ ហើយ​ហេដ្ឋារចនាសម្ព័ន្ធ​ក៏​គ្មាន​បាន​ធ្វើ​ដែរ។

លោក​បាន​អំពាវនាវ​ឲ្យ​ស្ថាប័ន​ម្ចាស់​ជំនួយ​ ADB​ រក​យុត្តិធម៌​ជូន​ប្រជាពលរដ្ឋ​ និង​ផ្តល់​សំណង​ដល់​ពលរដ្ឋ​ដែល​កំពុង​រង​ទុក្ខ​នោះ។​ ហើយ​បាន​បន្ថែម​ថា​ បណ្តឹង​ខ្លះ​កំពុង​ស្ថិត​ក្នុង​ដៃ​គណៈកម្មការ​សភា៕

 

 

 

No More ADB Funding to Finish Stalled Railway Project

By: Zsombor Peter , The Cambodia Daily, | March 11, 2015

Visiting Asian Development Bank (ADB) President Takehiko Nakao said Tuesday that no more money would be forthcoming from the bank to complete a stalled and bankrupt project to rehabilitate Cambodia’s old railway lines, a $142 million effort that had been billed as a key infrastructure initiative.

The ADB has put up most of the money for the work. And while the southern line from Phnom Penh to Sihanoukville is up and running, most of the work on the much longer stretch between the capital and Poipet City on the Thai border remains undone. At least $75 million is estimated to be needed to finish the line.

CD 001

Asian Development Bank President Takehiko Nakao, left, speaks during a press conference at the Bank’s office in Phnom Penh on Tuesday. (Siv Channa/The Cambodia Daily)

But at a press conference in Phnom Penh on Tuesday, Mr. Nakao said the money would not come from the ADB.

“The remaining part of our finance…will be used for taking care of the existing railway, the southern part and the completed part of the northern line,” he said. “That is the present state.”

Mr. Nakao said he was not aware of any plans the government might have for completing the work with other funds and that the project was not discussed during his meetings earlier in the day with Prime Minister Hun Sen and other officials.

In December, the ADB unveiled a five-year loan plan for Cambodia worth $800 million, including $148 million for trade and transportation projects. ADB country director Eric Sidgwick, who joined Tuesday’s press conference, said none of it would be spent on finishing the railway project—because the government had not asked.

“We have not received a request from the government,” Mr. Sidgwick said. “So when you see the transport pipeline, $148 million for that, these are for projects that have already been discussed with the government and there is government demand for these projects. So as of now, we have not received a request for that.”

The railway project has come under heavy rebuke from rights groups over the 4,000 families who have lost all or part of their land along the tracks to make way for the upgrade.

After commissioning an independent assessment, the ADB last year admitted to making major mistakes in designing and carrying out the project, mistakes that made the families who lost land worse off—a breach of bank policy. Under a government-approved aid plan, the families are in line to receive additional compensation to make up for their losses.

Mr. Nakao, who is scheduled to leave Cambodia Wednesday, said the ADB was still deciding how to provide the additional compensation.

One option the bank is considering, also criticized by rights groups, is to provide more microfinance loans to families forced to take on new debt because of their evictions.

 

មិន​មាន​ការ​ផ្តល់​មូលនិធិ​អេឌីប៊ី​បន្ថែម​ដល់​គម្រោង​ផ្លូវ​ដែក​ដែល​ជាប់​គាំង​ទេ

ដោយ៖ហ្សមប៊រ ភីធឺរ៍, ខេមបូឌា ដេលី,  ថ្ងៃទី១១ខែមីនា ឆ្នាំ២០១៥

ប្រធាន​ធនាគារ​អភិវឌ្ឍន៍​អាស៊ី​ដែល​មក​ធ្វើ​ទស្សន​កិច្ច លោក តាកេហ៊ីកុ ណាកាវ (Takehiko Nakao) បាន​មាន​ប្រសាសន៍​កាលពី​ថ្ងៃ​អង្គារ​ថា នឹង​មិន​មាន​ប្រាក់​ថែមទៀត​ពី​ធនាគារ​នេះ​ដើម្បី​បញ្ចប់​គម្រោង​ដែល​ជាប់​ គាំង​និង​ក្ស័យធន ដើម្បី​ស្ថារ​បណ្តាញ​ផ្លូវ​ដែក​ចាស់​របស់​ប្រទេស​កម្ពុជា គឺ​គម្រោង​មាន​ទឹក​ប្រាក់​១៤២​លាន​ដុល្លារ ដែល​ត្រូវ​គេ​ចាត់​ទុក​ថា​ជា​ការ​ផ្តួចផ្តើម​ហេដ្ឋា​រចនា​សម្ព័ន្ធ​ដ៏​ សំខាន់។

CD 003

ធនាគារ​អភិវឌ្ឍន៍​អាស៊ី​បាន​ប្រើ​ប្រាក់​ភាគច្រើន​សម្រាប់​គម្រោង​នេះ។ រីឯ​ផ្លូវ​ភាគ​ខាង​ត្បូង​ពី​ភ្នំពេញ​ទៅ​ក្រុង​ព្រះ​សីហនុ​កំពុង​ដំណើរការ​ នោះ កិច្ចការ​ភាគច្រើន​លើ​កំណាត់​ផ្លូវ​ដ៏​វែង ពី​រាជធានី​ដល់​ក្រុង​ប៉ោយប៉ែត​នៅ​ព្រំដែន​ថៃ មិន​ទាន់​ធ្វើ​នៅឡើយ​ទេ។ គេ​ប្រមាណ​ថា​ ត្រូវការ​យ៉ាងហោចណាស់​​ទឹក​ប្រាក់​៧៥​លាន​ដុល្លារ​ដើម្បី​ធ្វើ​បញ្ចប់​ផ្លូវ ​ដែក​មួយ​ខ្សែ​នេះ។

ប៉ុន្តែ​នៅ​ឯ​សន្និសីទ​ព័ត៌មាន​មួយ​ក្នុង​ក្រុង​ភ្នំពេញ​កាលពី​ថ្ងៃ​ អង្គារ លោក ណាកាវ បាន​មាន​ប្រសាសន៍​ថា ប្រាក់​នឹង​មិន​បាន​មក​ពី​ធនាគារ​អភិវឌ្ឍន៍​អាស៊ី​ទេ។

លោក​បាន​មាន​ប្រសាសន៍​ថា “ចំណែក​នៅ​សេសសល់​នៃ​ហិរញ្ញវត្ថុ​របស់​យើង នឹង​ត្រូវ​ប្រើ​សម្រាប់​ការ​ថែទាំ​ផ្លូវ​ដែក​ដែល​មាន​ស្រាប់ គឺ​ផ្នែក​ភាគ​ខាង​ត្បូង​និង​ផ្នែក​ដែល​ជួស​ជុល​រួចរាល់​នៃ​ខ្សែ​ភាគខាង​ជើង។ នោះ​ជា​ស្ថាន​ភាព​បច្ចុប្បន្ន”។

លោក ណាកាវ បាន​មាន​ប្រសាសន៍​ថា លោក​មិន​បាន​ដឹង​អំពី​ផែនការ​ណាមួយ ដែល​រដ្ឋាភិបាល​មាន​សម្រាប់​ការ​បញ្ចប់​ការងារ​ជាមួយ​នឹង​មូលនិធិ​ផ្សេងទៀត​ ទេ ហើយ​ថា គម្រោង​នោះ​មិន​ត្រូវ​បាន​លើក​មក​ពិភាក្សា​ក្នុង​អំឡុង​ជំនួប​របស់​លោក​នៅ​ ថ្ងៃ​នោះ ជាមួយ​លោក​នាយក​រដ្ឋ​មន្ត្រី ហ៊ុន សែន និង​មន្ត្រី​ផ្សេងទៀត​ទេ។

កាលពី​ខែ​ធ្នូ ធនាគារ​អភិវឌ្ឍន៍​អាស៊ី បាន​បញ្ចេញ​ឲ្យដឹង​នូវ​ផែនការ​កម្ចី​រយៈ​ពេល​ប្រាំ​ឆ្នាំ​សម្រាប់​ប្រទេស​ កម្ពុជា មាន​ទឹកប្រាក់​៨០០​លាន​ដុល្លារ ក្នុង​នោះ​មាន​ទាំង១៤៨​លាន​ដុល្លារ​សម្រាប់​គម្រោង​ពាណិជ្ជកម្ម​និង​ដឹក​ ជញ្ជូន។ ប្រធាន​ធនាគារ​អភិវឌ្ឍន៍​អាស៊ី​ប្រចាំ​ប្រទេស ​លោក អេរិក ស៊ិដវិក ដែល​បាន​ចូលរួម​ក្នុង​សន្និសីទ​កាសែត​កាលពី​ថ្ងៃ​អង្គារ​ដែរ បាន​មាន​ប្រសាសន៍​ថា មិន​មាន​ថវិកា​នឹង​ត្រូវ​ចំណាយ​លើ​ការ​បញ្ចប់​គម្រោង​ផ្លូវដែក​ទេ ពីព្រោះ​រដ្ឋាភិបាល​មិន​បាន​ស្នើ​សុំ។

លោក ស៊ិដវិក មាន​ប្រសាសន៍​ថា “យើង​មិន​​បាន​ទទួល​សំណើ​ពី​រដ្ឋាភិបាល​ទេ។ ដូច្នេះ​ពេល​ដែល​អ្នក​ឃើញ​ផ្លូវ​ដឹក​ជញ្ជូន គឺ​ទឹក​ប្រាក់​១៤៨​លាន​ដុល្លារ​សម្រាប់គម្រោង​នោះ ទាំង​នេះ​គឺ​សម្រាប់​គម្រោង​ដែល​បាន​ពិភាក្សា​គ្នា​រួច​ហើយ​ជាមួយ​ រដ្ឋាភិបាល ហើយ​រដ្ឋាភិបាល​ត្រូវ​ការ​សម្រាប់​គម្រោង​ទាំង​នេះ។ ដូច្នេះ​រហូត​ដល់​ពេល​នេះ យើង​មិន​បាន​ទទួល​សំណើ​ណាមួយ​សម្រាប់​គម្រោង​នោះ​ទេ”។

គម្រោង​ផ្លូវ​ដែក​កំពុង​រង​ការ​រិះគន់​យ៉ាង​ខ្លាំង​ពី​ក្រុម​សិទ្ធិ​ មនុស្ស​ជាច្រើន​ទាក់ទិន​នឹង​ប្រជាពល​រដ្ឋ​៤.០០០​គ្រួសារ ដែល​បាន​បាត់បង់​ទាំង​អស់​ឬ​មួយ​ផ្នែក​នៃ​ដី​ធ្លី​របស់​ខ្លួន​នៅ​តាម​បណ្តោយ ​ផ្លូវ​ដែក ដើម្បី​បើក​ផ្លូវ​សម្រាប់​ការ​អភិវឌ្ឍ​ផ្លូវ​ដែក។

បន្ទាប់ពី​ធ្វើ​ការ​វាយ​តម្លៃ​ឯករាជ្យ​មួយ ធនាគារ​អភិវឌ្ឍន៍​អាស៊ី​កាលពី​ឆ្នាំ​មុន​បាន​ទទួល​ស្គាល់​ការ​មាន​កំហុស​ដ៏​ ធំ​ក្នុង​ការ​រៀបចំ​និង​អនុវត្ត​គម្រោង​នេះ ជា​កំហុស​ដែល​បាន​ធ្វើ​ឲ្យ​គ្រួសារ​ជាច្រើន​ដែល​បាន​បាត់​បង់​ដី​ធ្លី​ កាន់តែ​ធ្លាក់​ខ្លួន​ក្រីក្រ​ទៅៗ ដែល​ជា​ការ​បំពាន​គោល​នយោបាយ​ធនាគារ​នោះ។ ក្រោម​ផែនការ​ជំនួយ​សម្រេច​ដោយ​រដ្ឋាភិបាល​នោះ គ្រួសារ​ទាំង​នោះ​មាន​ឈ្មោះ​ទទួល​សំណង​បន្ថែម​ដើម្បី​ប៉ះប៉ូវ​ការ​ខាតបង់​ របស់​ខ្លួន។

លោក ណាកាវ ដែល​គ្រោង​នឹង​ចាកចេញ​ពី​ប្រទេស​កម្ពុជា​នៅ​ថ្ងៃ​ពុធ បាន​មាន​ប្រសាសន៍​ថា ធនាគារ​អភិវឌ្ឍន៍​អាស៊ី​កំពុង​ធ្វើការ​សម្រេច​ថាតើ​ត្រូវ​ផ្តល់​សំណង​បន្ថែម ​របៀបណា​នៅ​ឡើយ។

ជម្រើស​មួយ​ដែល​ធនាគារ​នេះ​កំពុង​ពិចារណា ហើយ​ក៏​ត្រូវ​ក្រុម​សិទ្ធិ​មនុស្ស​រិះគន់​ដែរ​នោះ គឺ​ត្រូវ​ផ្តល់​កម្ចី​មីក្រូ​ហិរញ្ញវត្ថុ​ថែម​ទៀត​ដល់​គ្រួសារ​ដែល​ត្រូវ​គេ ​បង្ខំ​ឲ្យ​ចាក​ចេញ​ធ្វើ​ឲ្យ​មាន​​បំណុល​ថ្មី ដោយសារតែ​ការ​បណ្តេញ​ពី​ផ្ទះ​សំបែង​របស់​ពួកគេ៕ និត

ពលរដ្ឋ​រង​ផល​ប៉ះ​ពាល់​ដោយ​សារ​ការ​សាង​សង់​ផ្លូវ​ដែក​កំពុង​ប្រមូល​ផ្តុំ​គ្នា​តវ៉ា​នៅ​ខាង​កើត​​​ភូមិ​គ្រឹះ​សម្តេច​ហ៊ុន សែន

ដោយ៖ផ្កាយព្រឹក, កោះសន្ដិភាព,ថ្ងៃព្រហស្បតិ៍ ទី៥ កុម្ភៈ ២០១៥

រាជ​ធានី​ភ្នំពេញ​ ៖ តាម​សេចក្តី​រាយការណ៍​ពី​អ្នក​ឆ្លើយ​ឆ្លង​ព័ត៌​មាន​បាន​ឱ្យ​ដឹង​ថា នៅ​ព្រឹក​ថ្ងៃ​ទី​៥ កុម្ភៈ នេះ​ប្រជា​ពលរដ្ឋ​ដែល​រង​ការ​​ប៉ះ​ពាល់​ដោយ​សារ​ការ​សាង​សង់​ផ្លូវ​ដែក​ប្រមាណ​ជាង​៤០​នាក់​បាន​និង​កំពុង​​ប្រមូល​ផ្តុំ​​គ្នា​តវ៉ា​នៅ​​ចំណុច​ក្បែរ​ធនា​គារ​ADB ខាង​កើត​​ភូមិ​គ្រឹះ​សម្តេច​ហ៊ុន​ សែន ដោយ​មាន​លើក​បដា និង​ស្រែក​តាម​មី​ក្រូ​​​ទាម​ទារ​ឱ្យ​ធនា​គារ​អភិ​វឌ្ឍន៍​អាស៊ី​ (ADB)ដែល​ទទួល​សាង​សង់​ផ្លូវ​នេះ​ផ្អាក​គម្រោង​សាង​សង់​ផ្លូវ​ដែក​សិន​ និង​សិក្សា​ពី​ផល​ប៉ះ​ពាល់​លំនៅ​ឋាន​ប្រជា​ពលរដ្ឋ​ជាមុន​សិន​។

ពេល​នេះ​គេ​មិន​ទាន់​ឃើញ​ខាង​ធនា​គារ​ចេញ​មក​​​​​​​អន្តរា​គមន៍​នៅ​ឡើយ​ ហើយ​ការ​តវ៉ា​នេះ​ធ្វើ​ឡើង​ដោយ​​មិន​មានការ​បង្ក្រាប​ពី​អាជ្ញា​ធរ​ទេ​៕

 

ប្រជា​សហគមន៍​ផ្លូវ​រថភ្លើង​ទាមទារ​ឲ្យ​ADB​ផ្ដល់ព័ត៌មាន​ពី​គម្រោង​អភិវឌ្ឍន៍​តាម​ការសន្យា​​

ដោយ៖ណាត សុភាព, ភ្នំពេញប៉ុស្ដិ៍ុំ,ថ្ងៃព្រហស្បតិ៍ ទី៥ កុម្ភៈ ២០១៥

VOD 002

ប្រជាសហគមន៍​ផ្លូវ​រថភ្លើង​តវ៉ា​មុខ​ធនាគារ​អភវឌ្ឍន៍​អាស៊ី នៅ​ព្រឹក​ថ្ងៃ​ព្រហស្បតិ៍​នេះ (រូបភាព៖ កាន់ វិច្ឆិកា)

ប្រជា​សហគមន៍​រស់នៅ​តាម​បណ្តោយ​ផ្លូវ​រថភ្លើង​មាន​គ្នា​ប្រមាណ​៦០​នាក់​នៅ​ព្រឹក​ថ្ងៃ​ព្រហស្បតិ៍​នេះ​ប្រមូលផ្ដុំ​គ្នា​ជា​ថ្មី​មុខ​ធនាគារ​អភិវឌ្ឍន៍អាស៊ី​(ADB) ដើម្បី​ទាមទារ​ឲ្យ​ធនាគារ​នេះ​រៀបចំ​កិច្ចប្រជុំ​ជាមួយ​ក្រុមហ៊ុនអភិវឌ្ឍន៍​​ផ្លូវ​រថភ្លើង​​តាម​ការ​សន្យា ដើម្បី​សាកសួរ​ព័ត៌មាន​លម្អិត​ស្ដីពី​គម្រោង​សាងសង់​ផ្លូវ​រថភ្លើង ។​

​កាលពី​ថ្ងៃ​ទី​១៦ ខែ​មករា ឆ្នាំ​២០១៥ បន្ទាប់ពី​មាន​ការតវ៉ា​ពី​ប្រជាពលរដ្ឋ ធនាគារ ADB បាន​សន្យា​ជាមួយ​ប្រជា​សហគមន៍​ផ្លូវ​រថភ្លើង​ថា នឹង​ផ្តល់​ព័ត៌មាន​ពី​ការជួបប្រជុំ​សាធារណៈ​ជា​មួយ​ភាគី​ពាក់ព័ន្ធ​នៅ​ថ្ងៃ​អង្គារ ទី​២០ ខែ​មករា ទាក់ទង​នឹង​គម្រោង​សាងសង់​ផ្លូវ​រថភ្លើង​នេះ។​

​ប្រជាពលរដ្ឋ​ដែល​ចូលរួម​ធ្វើ​ការតវ៉ា​នៅ​ព្រឹក​នេះ​បានឲ្យដឹងថា កាលពី​ថ្ងៃ​ទី​២០ ខែ​មករា ADBមិន​បានរៀបចំឲ្យ​មាន​កិច្ច​ប្រជុំ​​ផ្ដល់​ព័ត៌មាន​ដូច​ការសន្យា​ទេ ដោយ​មន្ត្រី​នៅ​ធនាគារ​នេះ​បាន​ប្រាប់​ប្រជាពលរដ្ឋ​ថា មន្ត្រី​បរទេស​ដែល​ទទួល ខុសត្រូវ​លើ​កិច្ចការ​នេះ​ត្រូវមាន​ភារៈកិច្ច​ទៅ​ក្រៅប្រទេស ។​

​ពលរដ្ឋ​ឲ្យដឹង​ទៀតថា រហូតមកដល់​ពេលនេះ ពួកគេ​នៅ​មិនទាន់​ទទួលបាន​ព័ត៌មាន​ពីADB ​នៅឡើយ ទើប​ពួកគេ​នាំគ្នា​ធ្វើ​ការតវ៉ា​ជាថ្មី ដើម្បី​ទាមទារ​ឲ្យ​ស្ថាប័ន​នេះ ផ្តល់​ព័ត៌មាន​ឲ្យបាន​ជាក់លាក់ពី​ចំនួន​ម៉ែត្រ​ដែល​ត្រូវ​កំណត់​ចេញពី​ផ្លូវ​រថភ្លើង​ទៅ​ផ្ទះ​របស់​ពួកគេ ខណៈ​ពួកគេ​ព្រួយបារម្ភ​ពី​ការបណ្តេញចេញ​ពី​លំនៅដ្ឋាន​ទាំង​បង្ខំ ។​

​សហគមន៍​ទាំងនោះ​រួមមាន សហគមន៍​ភូមិ​២ ភូមិ​១៧ ភូមិ​១០៤ ភូមិ​១០៥ ភូមិ​២៣ សហគមន៍​រួមចិត្ត​តែមួយ និង​សហគមន៍​អភិវឌ្ឍន៍​ថ្មី​ជាដើម ។​
​ក្រុម​ប្រជា​សហគមន៍​បាន​ព្រមាន​ធ្វើបាតុកម្ម​ទ្រង់ទ្រាយ​ធំ ប្រសិន​បើ​ពួកគេ​នៅតែ​មិន​ទទួលបាន​ព័ត៌មាន​លម្អិត​ស្ដីពី​គម្រោង​សាងសង់​ផ្លូវ​រថ​ភ្លើង​នេះ ។​

​ភ្លាមៗ​នេះ VOD មិនទាន់​អាច​សុំ​ការឆ្លើយតប​ពី​ធនាគារ​អភិវឌ្ឍន៍​អាស៊ី (ADB)​បាន​នៅឡើយ​ទេ ។​

​គួរបញ្ជាក់​ថា ក្រុមហ៊ុន Toll Royal Railway និង​ក្រុមហ៊ុន Royal Group របស់លោក គិត ម៉េង  បាន​ទទួល​គម្រោង​សាងសង់​បណ្ដាញ​ផ្លូវដែក​កម្ពុជា ពី​រដ្ឋាភិបាល​កម្ពុជា​ចំនួន​២​ខ្សែ គឺ​ផ្លូវដែក​ពី​រាជធានី​ភ្នំពេញ ទៅ​ក្រុង​ព្រះសីហនុ  និង​ពី​ភ្នំពេញ​ទៅ​បន្ទាយមានជ័យ ។ គម្រោង​សាងសង់​ផ្លូវដែក​នេះ បាន​ធ្វើឲ្យប៉ះពាល់​ដល់​ប្រជាពលរដ្ឋ​ជាង​៣០០០​គ្រួសារ ។​

​កាលពី​ខែ​ធ្នូ ឆ្នាំ​២០១៤ ក្រុមហ៊ុន Toll Group ប្រកាសថា​បាន​លក់​ភាគហ៊ុន​៥៥​ភាគរយ​របស់ខ្លួន​នៅក្នុង​គម្រោង​សម្បទាន​ក្រុមហ៊ុន Toll Royal Railway ឲ្យទៅ Royal Group  របស់លោក គិត ម៉េង ដោយ​អះអាង​ថា មូលហេតុ​នៃ​ការសម្រេចចិត្ត​ដកខ្លួន​ចេញ ដោយសារ​ប្រាក់ចំណូល​ដែល​ទទួលបាន កាន់តែ​ទាប​ជាង​ការរំពឹងទុក រួម​ទាំង​ការបរាជ័យ និង​ការពន្យារពេល​ក្នុង​ការងារ​កែលម្អ​ផ្លូវដែក ៕

VOA 003

 

 

ថៃ-ជប៉ុន​ គ្រោង​សង់​ផ្លូវដែក​ភ្ជាប់​កម្ពុជា

ដោយ៖ The Bangkok Post, ភ្នំពេញប៉ុស្ដិ៍ុំ,  ថ្ងៃទី៣០ខែមករា ឆ្នាំ២០១៥

PP 008

អ្នកដំណើរ​កំពុង​ចុះ​ពី​រថភ្លើង​ផ្លូវ​លើ​នៅ​ទីក្រុង​បាងកក។ bloomberg

ក្រុងបាងកកៈ ប្រទេស​ថៃ និង​ជប៉ុន​បាន​យល់ព្រម​ជា​គោលការណ៍​ស្ដីពី​ការ​អភិវឌ្ឍ​រួម​លើ​បណ្ដាញ​ផ្លូវដែក​កម្រិត​ស្ដង់ដារ​មាន​ប្រវែង​១ ៤៣៥​គីឡូម៉ែត្រ​ដែល​តភ្ជាប់​ភូមិ​ជាប់​ព្រំប្រទល់​នៅ​ខេត្ត Kanchanaburi ប្រទេស​ថៃ​ជាមួយ​កម្ពុជា​។

កាលពី​ថ្ងៃ​អង្គារ​លោក​ឧបនាយករដ្ឋមន្ដ្រី Pridiyathorn Devakula បន្ទាប់ពី​ជំនួប​ជាមួយ​លោក Hiroto Izumi ទីប្រឹក្សា​ពិសេស​របស់​លោក​នាយករដ្ឋមន្ដ្រី ស៊ីនហ្សូ អាបេ បាន​ថ្លែង​ថា ទីក្រុង​តូក្យូ​មាន​បំណង​វិនិយោគ​ផ្លូវដែក​ក្នុង​ការ​តភ្ជាប់​គម្រោង Dawei នៅក្នុង​ប្រទេស​មីយ៉ាន់ម៉ា​មក​កម្ពុជា​កាត់​តាម​ក្រុង​ជាប់​ព្រំដែន Ban Phu Nam Ron នៅ​ខេត្ត Kanchanaburi ទីក្រុង​បាងកក ខេត្ត Chachoengsao និង​ស្រុក Aranyaprathet របស់​ខេត្ត​ស្រះកែវ​ប្រទេស​ថៃ​។

ផ្លូវ​នេះ​តភ្ជាប់​រវាង​ភាគ​ខាង​កើត និង​ភាគ​ខាង​លិច​ប្រទេស​ថៃ​ផ្សេង​ទៀត។

គណៈកម្មាធិការ​ការងារ​របស់​ថៃ និង​ជប៉ុន​នឹង​ត្រូវ​បាន​បង្កើត​ឡើង​ពេល​ក្រោយ​ដើម្បី​សិក្សា​ព័ត៌មាន​លម្អិត​ដូចជា ផ្លូវ ទំហំ និង​ប្រភេទ​នៃ​ការ​វិនិយោគ​។

នាយករដ្ឋមន្ដ្រី ប្រាយុធ ចានអូចា បាន​កំណត់​ពេល​ដើម្បី​ចុះហត្ថលេខា​លើ​អនុស្សរណៈ​នៃ​ការ​យោគយល់​ស្ដីពី​គម្រោង​ផ្លូវដែក​ក្នុង​អំឡុង​ដំណើរ​ទស្សនកិច្ច​ទៅកាន់​ប្រទេស​ជប៉ុន​របស់​លោក​នៅ​ថ្ងៃ​ទី​៨-៩​ខែ​កុម្ភៈ​។

ផ្លូវដែក​ចេញ​ពី​ប្រទេស​ថៃ​ទៅកាន់​ប្រទេស​មីយ៉ាន់ម៉ា​កាត់​តាម​ខេត្ត Kanchanaburi ធ្លាប់​បាន​សាកល្បង​ធ្វើ​ពី​មុន​មក ប៉ុន្តែ​គម្រោង​នេះ​ត្រូវ​បាន​ផ្អាក​ពី​ខែ​សីហា ឆ្នាំ​១៩៤៥​។

បច្ចុប្បន្ន Phu Nam Ron ល្បីឈ្មោះ​ថា ជា​ក្រុង​ឆ្លងកាត់​ព្រំដែន​សម្រាប់​ភ្ញៀវទេសចរ និង​អ្នក​រត់​ទិដ្ឋាការ​ពី​ប្រទេស​ថៃ​ដែល​កំពុង​ស្វែងរក​ដំណើរ​កម្សាន្ត​ប្រទេស​មីយ៉ាន់ម៉ា​ក្នុង​រយៈពេល​ខ្លី​។

លោក Pridiyathorn បាន​ថ្លែង​ថា​៖ «​ផ្លូវ​នេះ​នឹង​រត់​ក្នុង​ល្បឿន​លឿន​ជាង​ផ្លូវ​ទីក្រុង Nong Khai-ទីក្រុង​បាងកក- ក្រុង Map Ta Phut ដែល​នឹង​រត់​ក្នុង​ល្បឿន​ពី​ ១៦០​ ដល់​ ១៨០ ​គីឡូម៉ែត្រ​ក្នុង​មួយ​ម៉ោង ដោយសារ​តែ​ប្រទេស​ជប៉ុន​ចង់​អភិវឌ្ឍ​រថភ្លើង​មាន​ល្បឿន​លឿន​ពិតប្រាកដ​ជាមួយ​នឹង​ល្បឿន​ជាង ​២០០​ គីឡូម៉ែត្រ​ក្នុង​មួយ​ម៉ោង​»​។

ថ្មីៗ​នេះ លោក Prajin Juntong រដ្ឋមន្ដ្រី​ក្រសួង​ដឹកជញ្ជូន​បាន​ថ្លែង​បន្ទាប់ពី​កិច្ចប្រជុំ​មួយ​ស្ដីពី​គម្រោង​អភិវឌ្ឍន៍​ផ្លូវដែក ​ចិន-ថៃ ដែល​មន្ដ្រី​ថៃ និង​មន្ដ្រី​ចិន​មាន​គំនិត​ដូចជា​ទាក់ទង​នឹង​ការ​សាងសង់​ផ្លូវដែក​ប្រវែង​៨៧៣​គីឡូម៉ែត្រ ទីក្រុង Nong Khai- ទីក្រុង​បាងកក- ក្រុង Map Ta Phut-ទីក្រុង​បាងកក- ស្រុក Kaeng Khoi។

លោក Pridiyathorn បាន​ថ្លែង​ថា ប្រទេស​ជប៉ុន​បាន​ស្នើឲ្យ​មាន​ការវិនិយោគ​នៅក្នុង​គម្រោង Dawei ដែល​ជា​ការ​អភិវឌ្ឍ​រួម​រង់ចាំ​រយៈពេល​ជាយូរ​មក​ហើយ​រវាង​ប្រទេស​ថៃ និង​ប្រទេស​មីយ៉ាន់ម៉ា​។

Dawei ជា​ទីក្រុង​របស់​ប្រទេស​ មីយ៉ាន់ម៉ា ​ដែល​មាន​ចម្ងាយ ​៣៥០ ​គីឡូម៉ែត្រ នៅ​ភាគ​ខាង​លិច​ទីក្រុង​បាងកក នឹង​ក្លាយ​ជា​តំបន់​វិនិយោគ​គម្រោង​ធំៗ​ជាច្រើន និង​តំបន់​សេដ្ឋកិច្ច​ពិសេស​ (SEZ) ៕

 

 

គណៈប្រតិភូ​ផ្លូវដែកអាស៊ាន​​ចុះពិនិត្យមើលផ្លូវដែកដែលតភ្ជាប់គ្នា​រវាងកម្ពុជា-ថៃ

ដោយៈ វ៉ា វឌ្ឍនៈ, កោះសន្តិភាព,​ ថ្ងៃទី ១៦ ខែ តុលា ឆ្នាំ ២០១៤

គណៈប្រតិភូ​ផ្លូវដែកអាស៊ាន​​ចុះពិនិត្យមើលផ្លូវដែកដែលតភ្ជាប់គ្នា​រវាងកម្ពុជា-ថៃ

ខេត្តបន្ទាយមានជ័យ ៖​ សេចក្តីរាយការណ៍​ពីក្រុងប៉ោយប៉ែត​បានឲ្យដឹងថា​ នៅព្រឹកថ្ងៃទី១៦​ តុលា ២០១៤នេះ ​គណៈប្រតិភូផ្លូវដែក​អាស៊ានមួយក្រុម​នឹងចុះមកពិនិត្យ​មើលការដ្ឋាន​ សាងសង់ផ្លូវដែក​ដែលតភ្ជាប់រវាងកម្ពុជា-ថៃ​នៅចំណុចស្រុក​អារញ្ញប្រទេសថៃ ។

បើតាមអ្នកឆ្លើយឆ្លង​ព័ត៌មាន​កោះសន្តិភាព​ បានបញ្ជាក់ឲ្យដឹងទៀតថា ​ខណៈនេះដែរក្រុមដោះមីនថៃ ​បាននិងកំពុង​ពិនិត្យនិងដោះមីន​ទំាងនៅក្នុងទឹកដី​ថៃនិងកម្ពុជា ​ក្រោមស្ពានមិត្តភាពកម្ពុជា-ថៃ​ ហើយគណៈប្រតិភូ​នឹងមកដល់ក្នុង​ពេលបន្តិច​ទៀតនេះ ។

ព័ត៌មានលម្អិត​នឹងមានផ្សាយជូន​នៅលើសារព័ត៌មាន​កោះសន្តិភាព ៕