ប្រភព ៖ ភ្នំពេញ ប៉ុស្តិ៍ / ថ្ងៃពុធ ទី៦ ខែមេសា ឆ្នំាំ២០១៦, ដោយ ប៉ិច សុធារី and Ananth Baliga
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញបានប្រកាសលុបចោលគម្រោងសាងសង់ផ្លូវល្បឿនលឿនពីរាជធានីភ្នំពេញទៅកាន់ព្រលានយន្តហោះអន្តរជាតិភ្នំពេញ និងបានបញ្ជាឲ្យកែលម្អផ្លូវដែកពីស្ថានីយរថភ្លើងទៅគីឡូម៉ែត្រលេខ ៦ ធ្វើជាផ្លូវកៅស៊ូសម្រាប់ធ្វើដំណើរវិញដើម្បីបញ្ចប់ការតវ៉ា និងក្តីបារម្ភរបស់ប្រជាពលរដ្ឋដែលរងផលប៉ះពាល់ដោយសារគម្រោងនេះ។
ការប្រកាសនេះបានធ្វើឡើងក្រោយពីប្រជាពលរដ្ឋមកពីសហគមន៍ចំនួន ៨ រស់នៅតាមបណ្តោយផ្លូវរថភ្លើងបានតវ៉ានៅមុខក្រសួងសាធារណការ និងដឹកជញ្ជូនជាច្រើនលើកច្រើនសានាពេលកន្លងមកដើម្បីទាមទារឲ្យក្រសួង និងអ្នកពាក់ព័ន្ធបើកវេទិកាសាធារណៈបង្ហាញពីទំហំផលប៉ះពាល់ដោយសារការអភិវឌ្ឍគម្រោងផ្លូវល្បឿនលឿននេះ។
ក្នុងពិធីសម្ពោធដាក់ឲ្យប្រើប្រាស់អគាររដ្ឋបាលថ្មីរបស់សាលារាជធានីភ្នំពេញលោកនាយករដ្ឋមន្ត្រី ហ៊ុន សែន បានប្រកាសឲ្យប្រជាពលរដ្ឋទាំងនោះបញ្ឈប់ការធ្វើបាតុកម្ម និងទាមទារធ្វើវេទិកាសាធារណៈបន្តទៀតព្រោះលោកមិនអនុញ្ញាតឲ្យមានការសាងសង់ផ្លូវល្បឿនលឿនទេនាំតែពិបាក។
លោកថ្លែងថា៖ «មានក្រុមហ៊ុនដល់ទៅបីបួនកំពុងសិក្សាធ្វើអា Express way ពីនឹងទៅពោធិ៍ចិនតុងមិនទាន់បានអីផងធ្វើបាតុកម្មទាមទារធ្វើវេទិកាសាធារណៈឥឡូវបើយើងអត់ធ្វើមិនបាច់ធ្វើវេទិកាសាធារណៈទេព្រោះមិនដឹងនិយាយពីអី»។
បើទោះជាគម្រោងផ្លូវល្បឿនលឿននេះត្រូវលុបចោលតែលោកបានបញ្ជាឲ្យកែលម្អផ្លូវដែកពីស្ថានីយរថភ្លើងទៅគីឡូម៉ែត្រលេខ ៦ ធ្វើជាផ្លូវកៅស៊ូវិញ។
លោកថា៖ «ផ្លូវហ្នឹងមិនដែលប្រើណាបើអត់ដែលប្រើទេលុបផ្លូវរថភ្លើងហ្នឹងចោលទៅហើយយើងធ្វើផ្លូវឲ្យវាបានធំដើម្បីរំដោះចរាចរណ៍ចូលក្រុងភ្នំពេញ»។
យោងតាមរបាយការណ៍របស់ឧបនាយករដ្ឋមន្ត្រីប្រចាំការលោក គាត ឈន់ ដាក់ជូនលោកនាយករដ្ឋមន្ត្រី ហ៊ុន សែន ស្តីពីការបង្កើតក្រុមការងារសិក្សាលើគម្រោងវិនិយោគសាងសង់ផ្លូវអាកាសល្បឿនលឿនកាលពីថ្ងៃ ២៨ មករាបានឲ្យដឹងថាមានក្រុមហ៊ុន ៣ ដែលស្នើសុំវិនិយោគរួមមានក្រុមហ៊ុន OCIC ដែលគ្រោងចំណាយទុនវិនិយោគ ២១៥ លានដុល្លារ ក្រុមហ៊ុនហឺណានរបស់ចិនគ្រោងចំណាយទុនវិនិយោគជិត ២៦០ លានដុល្លារ និងក្រុមហ៊ុន Hohibbah Engineering។ តាមការសិក្សាជាបឋមគឺមានពលរដ្ឋជាង ១ ពាន់គ្រួសារដែលអាចរងផលប៉ះពាល់ហើយការចំណាយលើការដោះស្រាយមានទំហំធំ។
តំណាងប្រជាពលរដ្ឋដែលរងផលប៉ះពាល់អ្នកស្រី ឃួន សារិន បានគាំទ្រចំពោះការប្រកាសរបស់រដ្ឋាភិបាលដែលលុបចោលគម្រោងសាងសង់ផ្លូវល្បឿនលឿននេះតែអ្នកស្រីថាការអភិវឌ្ឍផ្លូវដែកទៅគីឡូម៉ែត្រលេខ ៦ ធ្វើជាផ្លូវកៅស៊ូក៏មានផលប៉ះពាល់ដល់លំនៅឋានពលរដ្ឋមួយចំនួនដែរ។ អ្នកស្រីបាននិយាយថា៖ «តែបើសិនថាត្រូវអភិវឌ្ឍប៉ះពាល់អ៊ីចឹងធ្វើម៉េចឲ្យប្រជាជនទទួលសំណងសមរម្យទៅតាមអ្វីដែលប្រជាជនចង់បាន»។
អ្នកគ្រប់គ្រងទូទៅនៃក្រុមហ៊ុនហឺណាន លោក Liu Yong បានថ្លែងថាលោកបានឮព័ត៌មាននេះតែក្រុមហ៊ុននៅមិនទាន់ទទួលបានលិខិតផ្លូវការពីរដ្ឋាភិបាលនៅឡើយ។
លោក លឹម ស៊ីដេនីន រដ្ឋលេខាធិការក្រសួងសាធារណការបានថ្លែងថាលោកនៅពុំទាន់បានទទួលព័ត៌មាននេះទេ។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ បានសាទរចំពោះការលុបចោលគម្រោងនេះ។
លោកថា៖ «អ្វីដែលគាត់ផ្អាកឈប់សាងសង់ផ្លូវល្បឿននេះមានន័យថាគាត់យល់ពីទុក្ខលំបាករបស់ពលរដ្ឋហើយដូច្នេះគោលការណ៍ជ្រើសរើសទិសដៅថ្មីយ៉ាងណានោះក៏គាត់នឹងរួមបញ្ចូលទុក្ខលំបាករបស់ពលរដ្ឋកាត់បន្ថយផលប៉ះពាល់របស់ពលរដ្ឋបើមិនដូច្នោះទេគឺមិនខុសពីអ្វីដែលគាត់ដេញម្ចាស់ឆ្នោតពីផ្ទះពីដីធ្លីដោយសារតែផ្លូវមួយខ្សែអ៊ីចឹងពលរដ្ឋក្រីក្រច្រើនណាស់ដែលជាម្ចាស់ឆ្នោតហ្នឹងនឹងដេញគាត់ចេញពីកៅអី»។
ក្នុងពិធីនោះដែរលោកនាយករដ្ឋមន្ត្រី ហ៊ុន សែន បានស្តីបន្ទោសខ្លាំងៗទៅប្រធានមន្ទីរសាធារណការរាជធានីភ្នំពេញលោក សាំ ពិសិដ្ឋ និងអាជ្ញាធរខណ្ឌដែលមិនអើពើជួសជុលផ្លូវខូចខណៈដែលមានពលរដ្ឋមួយចំនួនបានរអ៊ូរទាំងពីបញ្ហាផ្លូវថ្នល់នេះ។
លោកថា៖«ឯណា សាំ ពិសិដ្ឋ? មានភ្នែកមើលផ្លូវអត់ និយាយត្រង់ៗជាមួយគ្នាម៉ងឧស្សាហ៍ដើរមើលផងកុំនៅចងក្រវាត់កនៅក្នុងហ្នឹងអីខ្ញុំនិយាយត្រង់តាំងពីពេលលោកឯងឡើងមកគឺផ្លូវវាយ៉ាប់អាធ្វើផ្លូវថ្មីហ្នឹងវាបានដែរខ្ញុំអរហើយតែអាចាស់ហ្នឹងម៉េចមិនព្រមជួសជុលប្រយ័ត្នថ្ងៃណាមួយអស់បុណ្យអស់ស័ក្ដិ»។
លោក សាំ ពិសិដ្ឋ មិនអាចសុំការអធិប្បាយបានទេ៕
CAMBODIA TRAINSPOTTER 